Прапаганда здаровага ладу жыцця ў друку

Уступ
Вядомая прыказка кажа: “Каштоўнасць здароўя разумееш, калі яго ўжо няма”. Па якой прычыне чалавек можа задумацца аб каштоўнасці здароўя? Калі яму не спадабаецца свой фізічны вобраз (часцей за ўсё гэта дзяўчаты з іх разнастайнымі дыетамі), калі пагоршыўся стан здароўя свой альбо блізкага чалавека. Здаровы лад жыцця – гэтае словазлучэнне было вядома з часоў Старажытнай Грэцыі, але праблема здаровага ладу жыцця з’яўляецца нявырашанай і па сённяшні дзень.
У Беларусі ў апошнія дзесяцігоддзі павялічылася цікаўнасць да здаровага ладу жыцця на дзяржаўным узроўні. Аб гэтым сведчыць прыняцце ў лістападзе 2001 г. Саветам Міністраў дзяржаўнай праграмы па фарміраванню здаровага ладу жыцця насельніцтва на 2002-2006 гг. Дзякуючы прынятым мерам у многіх рэгіёнах Беларусі праводзяцца мерапрыемствы, што паказваюць каштоўнасць здаровага ладу жыцця. Жыхары Беларусі ўсведамляюць неабходнасць выканання асноўных патрабаванняў здаровага ладу жыцця, захавання і ўзмацнення здароўя. Клопат дзяржавы пра здароўе нацыі праяўляецца ў стварэнні ўмоў для заняткаў аматарскім спортам, падтрымцы спартыўных секцый і школ.
Акрамя гэтага, Прэзідэнт Рэспублікі Беларусь 4 красавіка 2006 г. зацвердзіў рэспубліканскую праграму “Моладзь Беларусі” на 2006-2010 гады. Праграма распрацавана з мэтай далейшай рэалізацыі дзяржаўнай маладзёжнай палітыкі. Адзін з яе кірункаў – прапаганда здаровага ладу жыцця, прыняцце папераджальных мер па нераспаўсюджванні сярод маладых людзей крыміналу, п’янства, наркаманіі. Праграма прадугледжвае стварэнне ўмоў для больш актыўнага ўключэння моладзі ў сацыяльна-эканамічнае, палітычнае і культурнае жыццё грамадства.
У гэтым годзе наша рэспубліка адзначае 60-годдзе членства ў САЗ (Сусветнай арганізацыі аховы здароўя). 7 красавіка, дзень стварэння САЗ, адзначаецца сусветны дзень здароўя. Рэспубліка Беларусь з’яўляецца адной з краін-заснавальніц САЗ і актыўна ўдзельнічае ў працы гэтай арганізацыі. Мэта супрацоўніцтва нашай дзяржавы з САЗ заключаецца ў тым, каб,...